International Journal of Academic Research! "Beynəlxalq Elmi Araşdırmalar Jurnalı" (ISSN: 2075-4124)ölkəmizdə nəşr olunan ingilisdilli elmi jurnaldır. Jurnalda elmin müxtəlif sahələrini əhatə edən tədqiqat işləri dərc olunur. BEAJ dünyanın 60-dan artıq ölkəsinə yayılır.

17.01.10/Martin Kamey/Birinci ağı

Martin Kamey. Birinci ağı

Tarix: 17.01.10// Tərcümə: Vüsal Nuru

Yorulduğum zaman,
Yaşımla artan zaman qayğılarım
Təzə ağrılarım
qurbanlıq quzu kimi
uzatdığı an məni tabuta.
Öldüyüm zaman
qoy qoca qadınlar tutsun yasımı.
Ölüləri üçün ağlasınlar üstümdə.

Yalnız bir istəyim var qadınım:
yadındamı iki öküz kəsdik
atam öldüyündə?
ətiylə acları doydurduq,
qarışqaları çörək qırıntılarıyla
İndi mən  öləcəyəm, bilirsən
itəcəyəm insanların arasından, qadınım,
Mən həmişə tox yaşadım deyə,
yasımda yalnız
acı qəhvə verərsən

Ölkəm

Öldüyüm zaman, dönsəm çayıra
Baharda çəmənlərdə  bitəcəyəm,
Payızda toxuma dönəcəyəm. 

Öldüyüm zaman, dönsəm suya,
Buğlu nəfəsim qalxacaq göylərə
Yağışım düşəcək
çöllərə.

Öldüyüm zaman dönsəm daşa
ölkəmin sərhədinə düşsəm,
Bir  də
sərhəd daşı ola bilsəm.

Dağ ziyafəti

Qan töküldü bu gün.
İki güllə çaxdı bir adam.

Baltanın başı qalxdı havaya
Öküzün başı kəsildi
Düşdü dərənin yanında.
Bu gün ziyafət olacaq!

Qan töküldü bu gün.
vəhşiləşən adamların ehtirasları
ətin qoxusuna qarışdı
alovun  üstündə. 
Od qovuran yarpaqlar düşdü,
öldü stolların ağ üzündə. 

Gecə.
Təpədəki məzarlarda
təzə torpaq,
yeni ay.
Qan qoxusu duyub dağlarda
Qurdlar enir dərələrə
Dərələrdə qal laxtası
lay-lay

   Martin Kamey   

    Martin Kamey 1925-ci ildə şimali Albaniyanın Dukaqyin regionunda yerləşən  Temali şəhərində anadan olub. O, Alban mühacir ədəbiyyatının ən görkəmli nümayəndlərindən  birindir. Martin Kamey  ilk təhsilini  Şkoderdə yerləşən “Yezuit Saverian” kollecində alıb. Daha  sonra təhsilini Belqrad Universitetində davam etdirib. Aspiranturanı bitirdikdən sonra tədqiqat aparmaq  üçün İtaliyaya  köçüb. 1960-cı ildə dissertasiya işini müdafiə edən Martin Kamey, Roma Universitetində Alban dili müəllimi olaraq çalışmağa başlayıb. 1970- cı ildə o Münxen Universitetinin professoru seçilib. 1990 –cı ilə kimi həmin universitetdə  Alban dilinin və dialektinin tədqiqatçısı kimi işləyib.
   Martin Kameyın 45 illik ədəbi fəaliyyəti bir neçə mərhələdən ibarətdir. O, yaradıcılığına poyeza ilə başlayıb. 1953 –cü ildə “Prishtina” (Dağların nəgməsi), 1954-cü ildə “Kanga e verrinit prishtina” (Ovalıq otlaqlarının nəğməsi) adlı  kitablarını doğma Alban dağlarına həsr etmişdi. Bu kitablarda toplanan şeirləri  Martin Kameyın sürgündə yaşadığı illərin acısından və ruhunun vətən üçün yandığından bəhs edir. 1958-ci ildə  “Diella” adlı romanı çap olunub. Əsər gənc bir müəllimin sevgisindən bəhs edir. 1964-cü ildə şairin “Legenda” adlı növbəti şeirlər kitabı işıq üzü görüb.1967-ci ildə şairin seçilmiş əsərlərindən ibarət şeirlər və poemalar kitabı çap olunub. 1981-ci ildə şairin yeni  “Drania” adlı kitabı və 1953-67 ci illərdə çap olunmuş nəsr və poeziya nümunələrindən ibarət  əsərlərinin yeni nəşri işıq üzü görüb. 1990-cı ildən Yuxarı Bavariyanın Lenqries kəndinə köçən Martin Kamey 12 mart 1992-ci ildə vəfat edib.   

çap versiyası  
poçtla göndər
© Lit.az